ຍີ່ປຸ່ນ ເກີດແຜ່ນດິນໄຫວ ລະດັບ 7,6 ຣິກເຕີ ເຮັດໃຫ້ມີຜູ້ເສຍຊີວິດຈຳນວນຫຼາຍ
ຕາມຂ່າວຈາກ ນະຄອນຫຼວງ ໂຕກຽວ, ປະເທດຍີ່ປຸ່ນໄດ້ເກີດແຜ່ນດິນໄຫວ ລະດັບ 7,6 ຣິກເຕີ ໃນວັນທີ 1 ມັງກອນ
2024 ນີ້, ມີສູນກາງຢູ່ ແຂວງອິຊິກາວະ ທາງພາກກາງຂອງ ຍີ່ປຸ່ນ, ສິ່ງກໍ່ສ້າງ, ເຮືອນຊານຂອງປະຊາຊົນ ແລະ ເສັ້ນທາງຫຼັກ
ຫຼາຍເສັ້ນໄດ້ຮັບຄວາມເສຍຫາຍເປັນບໍລິເວນກວ້າງ, ພາຍຫລັງເກີດແຮງສັ່ນສະເທືອນຕາມມາອີກຫລາຍກວ່າ 200 ຄັ້ງ,
ໜ່ວຍກູ້ໄພກູ້ຊີບຍີ່ປຸ່ນ ປະມານ 3.000 ຄົນໄດ້ເລັ່ງກຳລັງເຂົ້າຊ່ວຍເຫຼືອຜູ້ລອດຊີວິດຢ່າງເຕັມຄວາມສາມາດ, ແຕ່ກໍພົບ
ຄວາມຫຍຸ້ງຍາກ ເນື່ອງຈາກຊາກຫັກເພພັງຂອງສິ່ງກໍ່ສ້າງທັບຖົມ.
ຕາມຂ່າວຕ່າງປະເທດລາຍງານຫຼ້າສຸດ ວັນທີ 3 ມັງກອນ, ຢູ່ຫຼາຍເມືອງພົບຜູ້ເສຍຊີວິດແລ້ວ 50 ກວ່າຄົນ, ໄຟໄໝ້
ເຮືອນປະຊາຊົນ, ເຮືອນເພພັງຫລາຍ 100 ຫລັງ, ຍ້ອນຜົນກະທົບຈາກແຮງສັ່ນສະເທືອນຂອງແຜ່ນດິນໄຫວ, ດິນຖະຫຼົ່ມ
ແລະ ຄື້ນສຶນາມິ. ປັດຈຸບັນ ເຈົ້າໜ້າທີ່ກູ້ໄພພວມເລັ່ງໃຫ້ການຊ່ວຍເຫຼືອ ແລະ ອົບພະຍົບປະຊາຊົນໄປຢູ່ບ່ອນປອດໄພລວມ
57.000 ກວ່າຄົນ. ຂະນະດຽວກັນ, ໃນມື້ຖັດມາໄດ້ເກີດອຸບັດເຫດເຮືອບິນໂດຍສານ ຍີ່ປຸ່ນ ແອລາຍ ສາຍພາຍໃນປະເທດ
ກຳລັງລົງຈອດພໍດີຕີນແຕະໜ້າດິນ ຢູ່ສະໜາມບິນ ຮາເນດະ ແຕ່ປີກໄປເກາະເອົາເຮືອບິນໜ່ວຍຍາມຝັ່ງ ທີ່ກຳລັງຊ່ວຍເຫຼືອ
ຜູ້ປະສົບໄພແຜ່ນດິນໄຫວຢູ່ໃນທາງແລ່ນດຽວກັນ ເຮັດໃຫ້ເກີດລະເບີດ ແລະ ເກີດໄຟໄໝ້ເຮືອບິນທັງສອງລຳຢ່າງໄວວາ,
ໃນນັ້ນ ເຮືອບິນໂດຍສານມີຜູ້ໂດຍສານ ແລະ ຈຸບິນລວມ 379 ຄົນ.
ພາຍຫຼັງເກີດເຫດໜ່ວຍມອດໄຟໄດ້ເລັ່ງປະຕິບັດການຊ່ວຍເຫຼືອຄົນ ແລະ ມອດໄຟຢ່າງຮີບດ່ວນ, ໃນນີ້ ໄດ້ຍົບພະຍົບ
ຄົນອອກຈາກເຮືອບິນໂດຍສານດ້ວຍຄວາມປອດໄພ. ສ່ວນເຮືອບິນໜ່ວຍຍາມຝັ່ງມີທີມງານ 6 ຄົນ ໃນນີ້ເສຍຊີວິດ 5 ຄົນ.
ປັດຈຸບັນ, ທາງການ ຍີ່ປຸ່ນ ກຳລັງສືບສວນຫາສາເຫດວ່າເກີດຫຍັງຂຶ້ນກັບສາຍການບິນ.
ແຫຼ່ງທີ່ມາ: ໜັງສືພິມກອງທັບ
ວັນທີ 04/01/2024